প্ৰায় ১৫ দিন ধৰি নিৰুদ্দেশ হৈ থকা সোণম ৰঘুবংশীয়ে উত্তৰ প্ৰদেশৰ এখন থানাত আত্মসমৰ্পণ কৰিছে। মেঘালয়ত মধুচন্দ্ৰিকা (Meghalaya Case) কৰি থকা অৱস্থাত স্বামী ৰাজা ৰঘুবংশীক হত্যা কৰিছিল নেকি সেই বিষয়ে আৰক্ষীয়ে তদন্ত অব্যাহত ৰাখিছে। আনহাতে, সোণমৰ পিতৃ দেৱী সিঙে অৱশ্যে দাবী কৰে যে তেওঁৰ কন্যাই এনে কাম কৰিব নোৱাৰে।
তেওঁ অভিযোগ কৰে যে সমগ্ৰ কাহিনীটো মেঘালয় আৰক্ষীয়ে ৰচনা কৰিছে। একে সময়তে তেওঁ কয় যে চিবিআইৰ তদন্তৰ পিছতহে সমগ্ৰ বিষয়টো স্পষ্ট হ’ব। মেঘালয় আৰক্ষীয়ে জনোৱা মতে, উত্তৰ প্ৰদেশৰ গাজীপুৰৰ নন্দগঞ্জ আৰক্ষী থানাত আত্মসমৰ্পণ কৰে সোণমে।
মেঘালয় আৰক্ষীয়ে আৰু তিনিজন লোকক গ্ৰেপ্তাৰ কৰিছে। সোণমৰ পিতৃয়ে অৱশ্যে দাবী কৰিছে যে দেওবাৰে নিশা তেওঁৰ কন্যা গাজীপুৰৰ এখন ধাবালৈ গৈছিল। তাৰ পৰাই সোণমে ককায়েকক ফোন কৰে। ইয়াৰ পিছত আৰক্ষীয়ে ধাবাখনলৈ গৈ তেওঁৰ কন্যাক লৈ যায় বুলি দাবী কৰিছে সোণমৰ পিতৃয়ে।
সোমবাৰে পুৱা তেওঁ কয়, “মোৰ কন্যা নিৰ্দোষী। তেওঁৰ ওপৰত মোৰ বিশ্বাস আছে। তেওঁ এই কাম কৰিব নোৱাৰে (স্বামীক হত্যা)।” ইয়াৰ পিছতে মেঘালয় চৰকাৰ আৰু ৰাজ্যখনৰ আৰক্ষীক সমালোচনা কৰে সোণমৰ পিতৃয়ে। তেওঁ কয়, “আৰম্ভণিৰে পৰা ৰাজ্য (মেঘালয়) চৰকাৰে মিছা কথা কৈ আহিছে। মেঘালয় পুলিচেও মিছা কথা কৈছে। মোৰ ছোৱালীয়ে কিয় এই কাম কৰিব?” তেওঁ লগতে দাবী কৰে যে তেওঁলোকে (ৰাজা আৰু সোণম) দুয়ো পৰিয়ালৰ সন্মতি সাপেক্ষে বিয়া হৈছিল।
সোণমৰ পিতৃয়ে ‘প্ৰকৃত সত্য’ উলিয়াই আনিবলৈ চিবিআইৰ তদন্তৰ অনুৰোধ জনাইছে। এই অনুৰোধ সন্দৰ্ভত মধ্যপ্ৰদেশৰ মুখ্যমন্ত্ৰী মোহন যাদৱ আৰু কেন্দ্ৰীয় গৃহমন্ত্ৰী অমিত শ্বাহক সাক্ষাৎ কৰিব বুলিও তেওঁ কয়। আনহাতে, চিবিআইৰ তদন্ত আৰম্ভ হোৱাৰ লগে লগে মেঘালয় আৰক্ষী বিষয়াক গ্ৰেপ্তাৰ কৰা হ’ব বুলিও তেওঁ দাবী কৰে।
উল্লেখ্য যে ইন্দোৰৰ বাসিন্দা ৰাজা আৰু সোণামৰ বিয়া হৈছিল ১৯ মে’ত। পিছদিনা নৱবিবাহিত দম্পতী মেঘালয় ভ্ৰমণলৈ যায়।
শেষবাৰৰ বাবে ২৩ মে’ত ছ’হৰাৰ এটা হোমষ্টেত দুয়োকে একেলগে দেখা গৈছিল। ১১ দিনৰ অন্তত খাৱৈৰ পৰা উদ্ধাৰ হয় ৰাজাৰ মৃতদেহ। তেজৰ দাগ লগা কাপোৰ আৰু ৰেইনকোট এটাও উদ্ধাৰ কৰা হৈছে। কিন্তু সোণমক বিচাৰি পোৱা নগ’ল। আৰক্ষীয়ে জনোৱা মতে, শেষবাৰৰ বাবে ২৩ মে’ৰ দিনৰ ১.১৫ বজাত আত্মীয়ৰ সৈতে কথা পাতিছিল সোণমে।
সেইটোও দুষ্কৃতিকাৰীৰ হাতত পৰা বুলি অনুমান কৰা হৈছে। আনকি একাংশই তেওঁক অপহৰণ কৰি বাংলাদেশলৈ লৈ যোৱা বুলিও সন্দেহ কৰিছিল। কাৰণ সোণম আৰু ৰাজা নিৰুদ্দেশ হোৱা ঠাইৰ পৰা বাংলাদেশ সীমান্ত বৰ বেছি দূৰত নহয়। ৰাজা-সোণমৰ পৰিয়ালেও অপহৰণৰ অভিযোগ উত্থাপন কৰিছে। পৰিয়ালৰ লোকে তদন্তক লৈ কেইবাবাৰো অসন্তুষ্টি প্ৰকাশ কৰে।
লগতে ৰাজা-সোণম ঘটনা সন্দৰ্ভত মেঘালয় আৰক্ষীয়ে বাংলাদেশৰ সৈতেও যোগাযোগ কৰে। কিন্তু কোনো সঁহাৰি পোৱা নগ’ল। অৱশেষত ১৬ দিনৰ মূৰত উদ্ধাৰ হয় সোণম। স্বামীক হত্যাৰ অভিযোগত তেওঁক গ্ৰেপ্তাৰ কৰা হৈছে। সোণমৰ আত্মসমৰ্পণে মেঘালয়ত নৱবিবাহিত দম্পতীৰ নিৰুদ্দেশৰ তদন্তত নতুন মোৰ আনিছে।
