ছ’চিয়েল মিডিয়াৰ প্ৰভাৱশালী জ্যোতি মলহোত্ৰাৰ সৈতে পাকিস্তানী চোৰাংচোৱাৰ (Pakistani spy) যোগাযোগ কিমান ঘনিষ্ঠ হৈ উঠিছিল তদন্তকাৰী দলটোৱে তাৰ তদন্ত কৰি আছে। হাৰিয়ানা আৰক্ষীয়ে জনোৱা মতে, পাকিস্তানী চোৰাংচোৱাই জ্যোতিক নিজৰ ‘সম্পদ’ হিচাপে গঢ়ি তুলিব বিচাৰিছিল।
অৱশ্যে কেৱল জ্যোতিয়েই নহয়, পাকিস্তানী চোৰাংচোৱা সংস্থাক সহায় কৰাৰ অভিযোগত দেশৰ বিভিন্ন প্ৰান্তৰ পৰা মুঠ ৮ জন লোকক গ্ৰেপ্তাৰ কৰা হৈছে। অভিযুক্তসকল বিভিন্ন বৃত্তিৰ সৈতে জড়িত। উদাহৰণস্বৰূপে জ্যোতি ছ’চিয়েল মিডিয়াৰ প্ৰভাৱশালী। আনহাতে, কোনোবা ব্যৱসায়ী, আন কোনোবা ব্যক্তিগত নিৰাপত্তাৰক্ষী।
পাকিস্তানী চোৰাংচোৱাই তেওঁলোকৰ পৰা তথ্য সংগ্ৰহ কৰিবলৈ মূলতঃ দুটা বস্তুৰ লোভ দিছিল – খ্যাতি আৰু ধন।
আকৰ্ষণীয় কথা হৈছে যে অভিযুক্তৰ অধিকাংশয়ে যুৱ। হাৰিয়ানাৰ ৩৩ বছৰীয়া ছ’চিয়েল মিডিয়াৰ প্ৰভাৱশালী ব্যক্তি হৈছে জ্যোতি। পূৰ্বতে তেওঁ নিজৰ ইউটিউব চেনেলত ভ্ৰমণ সম্পৰ্কীয় ভিডিঅ’ আপলোড কৰিছিল।
জ্যোতিৰ বিৰুদ্ধে উত্থাপিত অভিযোগৰ তদন্ত সন্দৰ্ভত হাৰিয়ানাৰ হিছাৰ জিলাৰ আৰক্ষী অধীক্ষক শশংক কুমাৰ ছাৱনে দেওবাৰে কয় যে ‘আধুনিক যুদ্ধ’ সদায় সীমান্তত নহয়। তেওঁলোকে ছ’চিয়েল মিডিয়াৰ প্ৰভাৱশালীসকলক ব্যৱহাৰ কৰি নিজৰ একপক্ষীয় কাহিনী উপস্থাপন কৰিবলৈ চেষ্টা কৰে। শেহতীয়াকৈ পাকিস্তানী চোৰাংচোৱাই নিজৰ কামৰ বাবে ছ’চিয়েল মিডিয়াৰ প্ৰভাৱশালী লোকক ব্যৱহাৰ কৰাৰ চেষ্টা আৰম্ভ কৰিছে।
ছ’চিয়েল মিডিয়াৰ প্ৰভাৱশালীসকলে এই ফান্দত পৰে মূলত ‘শ্বেয়াৰ’, ‘ভিউ’ আৰু ‘লাইক’ পোৱাৰ প্ৰলোভনত। এই ক্ষেত্ৰতো একেধৰণৰ প্ৰয়াস কৰা হৈছিল আৰু ভাৰতৰ ভাবমূৰ্তি কলংকিত কৰাৰ প্ৰয়াস কৰা হৈছিল বুলি ধাৰণা কৰা হৈছে।
শেহতীয়াকৈ হাৰিয়ানাৰ কাইথালৰ পৰা ২৫ বছৰীয়া দেৱেন্দ্ৰ সিং ধিলনক গ্ৰেপ্তাৰ কৰা হয়। পঞ্জাৱৰ পাটিয়ালাৰ এখন কলেজত ৰাজনীতি বিজ্ঞানত স্নাতকোত্তৰ পাঠ্যক্ৰমত অধ্যয়ন কৰি আছিল দেৱেন্দ্ৰ। আন এটা গোচৰত তেওঁক আৰক্ষীয়ে গ্ৰেপ্তাৰ কৰে।
অৱশ্যে তদন্তত জানিব পৰা গৈছে যে যোৱা বছৰৰ নৱেম্বৰ মাহত তেওঁ পাকিস্তান ভ্ৰমণ কৰিছিল। সেই সময়তে তেওঁ পাকিস্তানী চোৰাংচোৱাৰ সংস্পৰ্শলৈ আহিছিল। অভিযুক্তই জেৰাৰ সময়ত স্বীকাৰ কৰে যে তেওঁ পাটিয়ালা সেনা শিবিৰৰ বাহিৰৰ পৰা লোৱা কিছু ফটো পাকিস্তানী চোৰাংচোৱা বিষয়াক দিছিল।
ইয়াৰ উপৰি কিছুদিন পূৰ্বে পাণিপথৰ পৰাও আৰক্ষীয়ে গ্ৰেপ্তাৰ কৰে হাৰিয়ানাৰ এজন ২৪ বছৰীয়া যুৱকক। ধৃত নুমান ইলাহী এটা ব্যক্তিগত কোম্পানীত নিৰাপত্তাৰক্ষী হিচাপে কৰ্মৰত আছিল। চোৰাংচোৱা সূত্ৰ অনুসৰি, পাকিস্তানী চোৰাংচোৱা নুমানৰ সংস্পৰ্শত আছিল।
আৰক্ষীয়ে জনোৱা মতে, নুমানে পাকিস্তানলৈ তথ্য প্ৰেৰণৰ বিনিময়ত ধন লাভ কৰিছিল। এই ধন পাকিস্তানৰ পৰা উত্তৰ প্ৰদেশৰ বাসিন্দা নুমানৰ এজন আত্মীয়ৰ বেংক একাউণ্টলৈ প্ৰেৰণ কৰা হয়। শেহতীয়াকৈ আৰক্ষীয়ে হাৰিয়ানাৰ নুহ অঞ্চলৰ এজন ২৩ বছৰীয়া যুৱকক পাকিস্তানলৈ চোৰাং তথ্য সৰবৰাহ কৰাৰ অভিযোগত গ্ৰেপ্তাৰ কৰিছে।
শনিবাৰে উত্তৰ প্ৰদেশৰ বিশেষ টাস্ক ফ’ৰ্চে গ্ৰেপ্তাৰ কৰে শ্বাহজাদ নামৰ এজন যুৱকক। শ্বাহজাদ পেছাত এজন ব্যৱসায়ী। অৱশ্যে আৰক্ষীৰ সূত্ৰ অনুসৰি, শ্বাহজাদে একাধিকবাৰ পাকিস্তান ভ্ৰমণ কৰিছে। আই এছ আইৰ সহায়ত তেওঁ সীমান্তৰ সিপাৰে বিভিন্ন বস্তু সৰবৰাহ কৰিছিল। তদন্তকাৰীয়ে জানিব পাৰিছে যে সৰবৰাহৰ ব্যৱসায়ৰ আঁৰত চোৰাংচোৱাগিৰি চলি আছিল।
শেহতীয়াকৈ পাকিস্তানলৈ তথ্য সৰবৰাহ কৰাৰ অভিযোগত গুজৰাটৰ জলন্ধৰৰ পৰা মহম্মদ মুৰ্তাজা আলী নামৰ এজন লোকক আৰক্ষীয়ে গ্ৰেপ্তাৰ কৰিছে। লগতে পাকিস্তানী চোৰাংচোৱা সংস্থা আই এছ আইক তথ্য ফাদিল কৰাৰ অভিযোগ উত্থাপন হৈছিল।
ইয়াৰ উপৰি পঞ্জাৱৰ পৰাও গজল আৰু ইয়ামিন মহম্মদ নামৰ দুজন লোকক গ্ৰেপ্তাৰ কৰা হৈছে। দেওবাৰে হাৰিয়ানাৰ হিছাৰৰ আৰক্ষী অধীক্ষকে কয় যে প্ৰাথমিক তদন্তত জ্যোতিৰ বাহিৰেও আন কেইবাজনো লোকৰ সৈতে পাকিস্তানী বিষয়াৰ সংস্পৰ্শলৈ অহাৰ কথা পোহৰলৈ আহিছে। অৱশ্যে সেই নামবোৰ আৰক্ষীয়ে ৰাজহুৱা কৰা নাই।
জ্যোতিৰ বাহিৰে আন কোনে পাকিস্তানীলৈ তথ্য প্ৰেৰণ কৰিছিল সেই বিষয়ে জানিবলৈ তদন্ত অব্যাহত আছে। দুই-তিনি দিনৰ ভিতৰত বিষয়টো স্পষ্ট হ’ব বুলি আৰক্ষীয়ে অনুমান কৰিছে। ইফালে সূত্ৰই জনোৱা মতে, ওড়িশা আৰক্ষীৰ পৃথক তদন্তত পুৰীৰ এজন ছ’চিয়েল মিডিয়াৰ প্ৰভাৱশালী ব্যক্তি জড়িত থকাৰ তথ্যও পোহৰলৈ আহিছে।
জ্যোতিৰ চিনাকি হৈছিল পুৰীৰ ছ’চিয়েল মিডিয়াৰ প্ৰভাৱশালী ব্যক্তিগৰাকীৰ সৈতে। সূত্ৰই জনোৱা মতে, যুৱতীগৰাকীৰ পাকিস্তানী বিষয়াৰ সৈতে কোনো ধৰণৰ যোগাযোগ আছিল নেকি সেই বিষয়েও তদন্ত চলি আছে।
