পূৰ্ব ঘোষিত ভ্ৰমণৰ সময়সূচী নোহোৱাকৈয়ে হঠাৎ নতুন দিল্লীত উপস্থিত হয় চৌদি আৰবৰ বৈদেশিক পৰিক্ৰমা ৰাজ্যিক মন্ত্ৰী আদেল আল জুবেইৰ। তেওঁ বৈদেশিক মন্ত্ৰী এছ জয়শংকৰৰ সৈতে এক ৰুদ্ধদ্বাৰ বৈঠকতো মিলিত হয়।
ইতিমধ্যে পহেলগাম হত্যাকাণ্ডৰ ১৫ দিনৰ পাছত পাক অধিকৃত কাশ্মীৰ আৰু পঞ্জাব প্ৰদেশৰ ৯টা সন্ত্ৰাসবাদী শিবিৰত ভাৰতীয় সেনাৰ ‘অপাৰেচন সিন্দুৰ’ (Operation Sindoor) ক লৈ উপ-মহাদেশখনত উত্তেজনা অব্যাহত আছে।
এই প্ৰসংগত একাংশ কূটনৈতিক পৰ্যবেক্ষকে আদেলৰ এই ভ্ৰমণক ‘তাৎপৰ্যপূৰ্ণ’ বুলি গণ্য কৰিছে। তেওঁলোকৰ মতে, আমেৰিকাৰ গুৰুত্বপূৰ্ণ মিত্ৰ চৌদি আৰবৰ মন্ত্ৰীগৰাকীৰ এই আকস্মিক ভ্ৰমণৰ লক্ষ্য হৈছে নতুন দিল্লী আৰু ইছলামাবাদৰ মাজত উত্তেজনা লাঘৱ কৰা।
চৌদি আৰবৰ বৈদেশিক মন্ত্ৰালয়ৰ এক এক্স পোষ্টত কোৱা হৈছে, “আদেলে ভাৰতৰ বৈদেশিক মন্ত্ৰী জয়শংকৰৰ সৈতে এক গুৰুত্বপূৰ্ণ বৈঠকত মিলিত হয়। সন্ত্ৰাসবাদৰ বিৰুদ্ধে সংকল্পবদ্ধভাৱে যুঁজ দিয়াৰ বিষয়টোক লৈ ভাৰতৰ সৈতে মত বিনিময় হয়।”
আনহাতে, ভাৰতৰ সামৰিক অভিযানক লৈ নতুন দিল্লী আৰু ইছলামাবাদৰ মাজত উল্লেখযোগ্য উত্তেজনাৰ মাজতে বুধবাৰে গভীৰ নিশা ইৰাণৰ বৈদেশিক মন্ত্ৰী আব্বাছ আৰাঘচিও ভাৰতত উপস্থিত হয় । উল্লেখ্য যে দশক দশক ধৰি পশ্চিম এছিয়াত ছৌদি আৰবৰ ডাঙৰ শত্ৰু হৈছে ইৰাণ।
