ভাৰতে মঙলবাৰে মাজনিশা পাকিস্তানৰ বিৰুদ্ধে চলোৱা প্ৰতিশোধমূলক আক্ৰমণত আঠজন লোক নিহত হোৱাৰ দাবী ইছলামাবাদৰ (Operation Sindoor)। এক সংবাদমেলত পাকিস্তানৰ আন্তঃ-সেৱা জনসম্পৰ্কৰ (আই এছ পি আৰ) সঞ্চালক প্ৰধানে এই তথ্য প্ৰকাশ কৰে।
প্ৰতিবেদন অনুসৰি, ভাৰতীয় বাহিনীয়ে পুৱা ১ বজাৰ ভিতৰত পাকিস্তানৰ ছয়টা স্থানত ২৪ টা আক্ৰমণ চলাইছিল। এইটো দাবী কৰা হৈছে যে অসামৰিক লোকসকলকো আক্ৰমণ কৰা হৈছে। পাকিস্তানেও কেইবাগৰাকীও মহিলা আৰু শিশুৰ মৃত্যুৰ খবৰ দিছে।
“বাহাৱালপুৰৰ পূবৰ আহমেদপুৰৰ শুভন মছজিদত এই আক্ৰমণ সংঘটিত হৈছিল। ইয়াত হোৱা চাৰিটা আক্ৰমণত তিনি বছৰীয়া শিশুসহ পাঁচজন নিৰীহ লোক নিহত হৈছে। তাৰ উপৰি ২৫ জন পুৰুষ আৰু ৬ গৰাকী মহিলাকে ধৰি ৩১ জন লোক আহত হৈছে।” পাক সেনাই প্ৰকাশ কৰিছে।
লগতে কয়, “মুজাফ্ফৰাবাদৰ বিলাল মছজিদক লক্ষ্য কৰি লোৱা হৈছে। সাতটা আক্ৰমণত এজন লোক আহত হয় আৰু মছজিদটো ধ্বংস হয়। ”
বিবৃতি অনুসৰি, কোটলী অঞ্চলৰ আব্বাছ মছজিদত পাঁচটা আক্ৰমণ হৈছিল। তাত দুজন লোকৰ মৃত্যু হৈছে। তেওঁলোকৰ এজন ১৮ বছৰীয়া পুৰুষ আৰু আনজন হৈছে এগৰাকী ১৬ বছৰীয়া ছোৱালী। এগৰাকী মহিলা আৰু তেওঁৰ কন্যা আঘাতপ্ৰাপ্ত হয়।
আনহাতে, মুৰিদকেৰ উমালকুৰা মছজিদত চাৰিটা আক্ৰমণ হয়। তাত এজন লোক নিহত আৰু এজন আহত হয়। আনহাতে, দুজন লোক সন্ধানহীন হৈ আছে। মছজিদটোও ধ্বংস কৰা হয়।
শিয়ালকোটৰ কোটকী লোহাৰা গাঁৱত দুটা আক্ৰমণ সংঘটিত হয়। অৱশ্যে কোনো লোক হতাহত হোৱাৰ খবৰ পোৱা হোৱা নাই। শকৰগড়ৰ ওচৰত দুটা আক্ৰমণৰ খবৰো পোৱা গৈছে।
তাতো অৱশ্যে কোনো লোক হতাহত হোৱাৰ খবৰ পোৱা হোৱা নাই। পাকিস্তানৰ আই এছ পি আৰ ডিজিয়ে ভাৰতৰ ‘অপাৰেচন সিন্দুৰ’ক “অপ্ৰৰোচিত কাপুৰুষোচিত আক্ৰমণ” বুলি অভিহিত কৰিছে। তেওঁ লগতে কয় যে ইয়াৰ যোগ্য প্ৰত্যুত্তৰ দিয়া হ’ব।
