ভাৰতীয় সুৰক্ষা সংস্থাই পহেলগাম হত্যাকাণ্ডত (Pahalgam Attack) জড়িত চাৰিজন সন্ত্ৰাসবাদীক চিনাক্ত কৰিছে। এই চাৰিজন সন্ত্ৰাসবাদীৰ আলোকচিত্ৰ ইতিমধ্যে মুকলি কৰা হৈছে।
তেওঁলোকক আদিল, আচিফ ফুজি, চুলেমান শ্বাহ আৰু আবু তালহা বুলি চিনাক্ত কৰা হৈছে। উল্লেখ্য যে মঙলবাৰে আবেলি জম্মু-কাশ্মীৰৰ অনন্তনাগ জিলাৰ পহেলগাম অঞ্চলত সন্ত্ৰাসবাদীয়ে গুলীচালনা কৰে।
চোৰাংচোৱা সূত্ৰই দাবী কৰা মতে, আক্ৰমণকাৰীৰ সংখ্যা পাঁচৰ পৰা ছয় আছিল। সকলোৰে মুখত মাস্ক আছিল। তেওঁলোকৰ হাতত আছিল এ কে-47 বন্দুক। হঠাতে তেওঁলোকে পৰ্যটকসকলৰ ওপৰত গুলীবৰ্ষণ কৰিবলৈ আৰম্ভ কৰে। এতিয়ালৈকে পহেলগামত হোৱা আক্ৰমণত ২৬ জন লোকৰ মৃত্যু হৈছে। আন কেইবাজনো আহত হৈছে।
চোৰাংচোৱা সূত্ৰৰ মতে, আটাইকেইজন সন্ত্ৰাসবাদী টি আৰ এফৰ সদস্য। অৱশ্যে আক্ৰমণটোৰ মূল সূত্ৰধাৰ হৈছে চৈফুল্লা খালিদ ওৰফে চৈফুল্লা কাচুৰী। তেওঁ লস্কৰৰ অন্যতম প্ৰধান। চৈফুল্লা সন্ত্ৰাসবাদী গোটটোৰ অন্যতম নেতা আৰু ভাৰতৰ ৱাণ্টেড তালিকাত থকা হাফিজ ছঈদৰ ঘনিষ্ঠ বুলিও জনা যায়।
ইফালে জম্মু-কাশ্মীৰ চৰকাৰে মৃতকৰ পৰিয়াললৈ ১০ লাখ টকাৰ অনুদান ঘোষণা কৰিছে। গুৰুতৰভাৱে আঘাতপ্ৰাপ্ত লোকসকলক ২ লাখ টকা আৰু কম গুৰুতৰভাৱে আঘাতপ্ৰাপ্ত লোকসকলক ১ লাখ টকাৰ অনুদান প্ৰদান কৰা হ’ব।
