গান্ধী পৰিয়ালৰ জোঁৱাই তথা সাংসদ প্ৰিয়ংকা গান্ধীৰ স্বামী, ব্যৱসায়ী ৰবাৰ্ট ভাদ্ৰাক (Robert Vadra) বিত্তীয় লেনদেন আৰু বেনামী সম্পত্তি ক্ৰয়ৰ গোচৰত জেৰাৰ বাবে পুনৰ চমন কৰিছে ইডিয়ে। অৱশ্যে মঙলবাৰে ইডিৰ কাৰ্যালয়লৈ যোৱাৰ পথত প্ৰিয়ংকা গান্ধীৰ স্বামীয়ে কেন্দ্ৰীয় তদন্তকাৰী দলৰ চমনক ‘বিজেপিৰ ৰাজনৈতিক প্ৰতিশোধৰ উদাহৰণ’ বুলি অভিহিত কৰে।
হাৰিয়ানাৰ ভূমি দুৰ্নীতিৰ গোচৰৰ সৈতে জড়িত আছিল ৰবাৰ্টৰ নাম। এই গোচৰত তেওঁক দ্বিতীয়বাৰৰ বাবে চমন কৰা হৈছে। ইয়াৰ পূৰ্বে ৮ এপ্ৰিলত ৰবাৰ্টক ইডিৰ কাৰ্যালয়ত হাজিৰ হ’বলৈ কোৱা হৈছিল যদিও তেওঁ যোৱা নাছিল। মঙলবাৰে তেওঁ কয়, “যেতিয়াই মই ৰাইজৰ বাবে মাত মাতো তেতিয়াই তেওঁলোকে মোক দমন কৰিবলৈ চেষ্টা কৰে। কিন্তু মোৰ লুকুৱাবলৈ একো নাই। ইডিয়ে মোক যি সুধিব, মই সকলো প্ৰশ্নৰ উত্তৰ দিম।”
সূত্ৰ অনুসৰি, ৫৬ বছৰীয়া ব্যৱসায়ীজনৰ বক্তব্য ইডিয়ে প্ৰিভেনচন অৱ মানি লণ্ডাৰিং এক্টৰ (পিএমএলএ) অধীনত লিপিবদ্ধ কৰিব। কেইবছৰমানৰ আগতে ৰবাৰ্টক ইডিয়ে আন এটা বিত্তীয় দুৰ্নীতিৰ গোচৰতো জেৰা কৰিছিল।
২০০৮ চনৰ ফেব্ৰুৱাৰী মাহত ৰবাৰ্টৰ প্ৰতিষ্ঠান স্কাইলাইট হস্পিটেলিটিয়ে ৭.৫ কোটি টকাত ক্ৰয় কৰা মাটি এটুকুৰাক লৈ বিতৰ্কৰ সৃষ্টি হয়। অভিযোগ অনুসৰি, উক্ত ভূমিৰ মিউটেচন প্ৰক্ৰিয়াটো মাত্ৰ এদিনতে সম্পূৰ্ণ হৈছিল, যিটো সম্পূৰ্ণ হ’বলৈ সাধাৰণতে কেইবামাহো সময় লাগে।
পিছত এই মাটি ৫৮ কোটি টকাত ৰিয়েল ইষ্টেট ফাৰ্ম ডি এল এফক বিক্ৰী কৰা হয়। যদিও ২০২৩ চনত হাৰিয়ানাৰ বিজেপিৰ মুখ্যমন্ত্ৰী মনোহৰলাল খট্টৰ চৰকাৰে আদালতত স্বীকাৰ কৰিছিল, তথাপিও ৰবাৰ্টৰ প্ৰতিষ্ঠানৰ সৈতে ডি এল এফৰ মাটিৰ চুক্তিত কোনো অবৈধ তথ্য পোৱা নগ’ল।
ইয়াৰ উপৰি ইডিয়ে অভিযোগ কৰে যে ২০০৯ চনত ৰবাৰ্টে অস্ত্ৰ ব্যৱসায়ী সঞ্জয় ভাণ্ডাৰীৰ সৈতে লণ্ডনত এটা ‘বেনামী’ সম্পত্তি ক্ৰয় কৰিছিল। সেই গোচৰৰ অভিযোগনামাত প্ৰিয়ংকাৰ নামো আছে। বিগত লোকসভা নিৰ্বাচনৰ পূৰ্বে নৰেন্দ্ৰ মোদীৰ চৰকাৰে লণ্ডনত থকা সেই ঘৰটোৰ বিষয়ে ৰবাৰ্ট আৰু তেওঁৰ সম্পাদকৰ মাজত আদান-প্ৰদান কৰা কিছু ইমেইলৰ ‘তথ্য’ ৰাজহুৱা কৰিছিল।
য’ত দুয়োপক্ষই ঘৰৰ মেৰামতিৰ বাবে ধন দিয়াৰ কথা কৈছে। লণ্ডনৰ অভিজাত অঞ্চলৰ ঘৰটো এবছৰৰ ভিতৰত বিক্ৰী হয়। সেই গোচৰত ২০১৯ চনৰ ফেব্ৰুৱাৰী মাহত ৰবাৰ্টক দীৰ্ঘদিন ধৰি জেৰা কৰা হৈছিল।
উল্লেখ্য যে সোমবাৰে ৰবাৰ্টে কয় যে কংগ্ৰেছৰ শীৰ্ষ নেতৃত্বই ইচ্ছা কৰিলে তেওঁ ৰাজনীতিত যোগদান কৰিবলৈ সাজু। ৰবাৰ্টৰ পত্নী প্ৰিয়ংকা কেৰালাৰ ৱায়নাড়ৰ কংগ্ৰেছ সাংসদ।
সোমবাৰে ৰবাৰ্টে কয় যে যদি কংগ্ৰেছৰ নেতৃত্বই বিচ্ছিন্নতাবাদী শক্তিৰ বিৰুদ্ধে যুঁজত অধিক লোকক জড়িত কৰিব বিচাৰে, তেন্তে তেওঁলোকে মোক নিশ্চিতভাৱে ৰাজনীতিত যোগদান কৰিবলৈ ক’ব। অৱশ্যে তেওঁ এইটোও কয় যে এতিয়ালৈকে গান্ধী-নেহৰু পৰিয়ালৰ সৈতে তেওঁৰ আত্মীয়তা তেওঁৰ একমাত্ৰ ৰাজনৈতিক যোগসূত্ৰ। উক্ত ঘোষণাৰ মাত্ৰ এদিন পিছতে এইবাৰ ইডিয়ে ৰবাৰ্টক তলব কৰে।
