বোকাখাতৰ সমীপৰ ইকৰাজান (Ikrajan near Bokakhat)ত ৩৭ নং ৰাষ্ট্ৰীয় ঘাইপথত সোমবাৰে নিশা সংঘটিত ভয়ংকৰ পথ দুৰ্ঘটনা (Road accidents)ত ১ জন নিহত (1 killed) হয়। জানিব পৰা মতে অংকুৰ বৰা (Ankur Bora) (২৯) নামৰ এজন যুৱকজনে বোকাখাতৰ পৰা যোৰহাটৰ দিশে চলাই যোৱা এ এচ ০৯ এফ ০৮৭৬ নম্বৰৰ ‘ৱেগন আৰ’ নিজা বাহনখনে ইকৰাজানৰ ৩৭ নং ৰাষ্ট্ৰীয় ঘাইপথত একেদিশে ৰখাই থোৱা এ এচ ০৩ চি চি ৭৫৮২ নম্বৰৰ ১১০৯ ট্ৰাকখনৰ পিছফালে প্ৰচণ্ড খুন্দা মাৰে। ইঞ্জিনৰ সমস্যাজনীত কাৰণত ট্ৰাকখন ৰখাই থোৱা হৈছিল বুলি জানিব পৰা গৈছে।
দুৰ্ঘটনাত পতিত চালক বৰাক ঘটনাস্থলীত উপস্থিত ট্ৰাকখনৰ চালকগৰাকীৰ লগতে ততালিকে উপস্থিত হোৱা স্থানীয় ৰাইজৰ সহযোগত পতিত অৱস্থাৰ পৰা উলিয়াই আনি বোকাখাত শ্বহীদ কমলা মিৰি মহকুমা অসামৰিক চিকিৎসালয়লৈ ১০৮ যোগে লৈ অনা হয় যদিও নিয়াৰ পথতে বৰাৰ মৃত্যু ঘটে আৰু চিকিৎসালয়ত মৃত ঘোষণা কৰে বুলি সেই সময়ত কৰ্তব্যৰত ডা: অৰ্ণৱজ্যোতি ডেকাৰ পৰা জানিব পৰা গৈছে। ৱেগন আৰ বাহনখনৰ চালক বৰাই আছিল দুৰ্ঘটনাৰ সময়ত একমাত্ৰ আৰোহী।
বোকাখাতৰ লখৌজানৰ ধৰ্মেশ্বৰ বৰাৰ একমাত্ৰ পুত্ৰ তথা চতুৰ্থ সন্তান প্ৰয়াত অংকুৰ বৰাই নিশা বোকাখাতৰ পৰা লখৌজানস্থিত নিজা ঘৰলৈ উভতি গৈ আছিল বুলি প্ৰকাশ। বৰাই পত্নী পাখী বৰাৰ লগতে পিতৃ-মাতৃ, তিনি বিবাহিতা জ্যেষ্ঠ ভগ্নীকে ধৰি পৰিয়াল-স্বজনক ইহসংসাৰত এৰি থৈ গৈছে। বোকাখাত পশু চিকিৎসা বিভাগত কৰ্মৰত সৰবৰহী যুৱক বৰাৰ আকস্মিক মৃত্যুত সমগ্ৰ বোকাখাত অঞ্চলত শোকৰ ছাঁ পৰিছে।
