ষ্টেচনত যাত্ৰীৰ অতিমাত্ৰা ভিৰ বা ৰে’ল ধৰিবলৈ লৰালৰি আদি বিভিন্ন কাৰণত দুৰ্ঘটনা সংঘটিত হ’ব পাৰে। বিশেষকৈ এই আশংকা বৃদ্ধি পায় উৎসৱৰ বতৰত।
শেহতীয়াকৈ নতুন দিল্লী ষ্টেচনত সংঘটিত ভয়াৱহ ঘটনাৰ (Delhi Stempede Case) পিছতে যাত্ৰীৰ সুৰক্ষাৰ ওপৰত প্ৰশ্ন উত্থাপন হয়। ইয়াৰ পৰিপ্ৰেক্ষিততে ষ্টেচনত যাত্ৰী নিয়ন্ত্ৰণৰ ক্ষেত্ৰত ভাৰতীয় ৰে’লৱে কঠোৰ হৈ পৰিছে।
কেন্দ্ৰীয় ৰে’ল মন্ত্ৰী অশ্বিনী বৈষ্ণবে শুকুৰবাৰে এখন উচ্চ পৰ্যায়ৰ বৈঠকত যাত্ৰী নিয়ন্ত্ৰণৰ বাবে কি পদক্ষেপ ল’ব পাৰে সেই বিষয়ে আলোচনা কৰে। সূত্ৰ অনুসৰি, উক্ত বৈঠকত কেইবাটাও সিদ্ধান্ত লোৱা হয়। জানিব পৰা মতে, অতিমাত্ৰা ভিৰ নিয়ন্ত্ৰণৰ বাবে দেশৰ ডাঙৰ ডাঙৰ ষ্টেচনৰ বাহিৰত যাত্ৰীসকলৰ বাবে ‘ৱেটিং ৰুম’ নিৰ্মাণ কৰা হ’ব।
গন্তব্য ৰে’লখন ষ্টেচন পোৱাৰ পূৰ্বে কেৱল সংশ্লিষ্ট যাত্ৰীসকলকহে ষ্টেচনত প্ৰৱেশৰ অনুমতি দিয়া হ’ব। নতুন দিল্লী, আনন্দ বিহাৰ, বাৰাণসী, অযোধ্যা আৰু পাটনা ষ্টেচনত ভিৰ নিয়ন্ত্ৰণৰ বাবে ইতিমধ্যে ‘পাইলট প্ৰজেক্ট’ আৰম্ভ হৈছে।
ইয়াৰ ফলাফলৰ ভিত্তিত দেশৰ মুঠ ৬০টা ষ্টেচনত পৰ্যায়ক্ৰমে নতুন নিয়ম প্ৰৱৰ্তন কৰা হ’ব। নতুন নিয়মৰ অধীনত ৰে’লৱেই ষ্টেচনলৈ যাত্ৰীৰ প্ৰৱেশ সম্পূৰ্ণৰূপে নিয়ন্ত্ৰণ কৰিব। কেৱল নিশ্চিত সংৰক্ষিত টিকট থকা যাত্ৰীসকলকহে ষ্টেচনত প্ৰৱেশৰ অনুমতি দিয়া হ’ব।
ইয়াৰ উপৰি ষ্টেচনসমূহৰ ফুটব্ৰিজ সম্প্ৰসাৰণ কৰা হ’ব। ১২ মিটাৰ আৰু ৬ মিটাৰ বহল ফুটব্ৰিজ নিৰ্মাণৰ পৰিকল্পনা কৰা হৈছে। কেৱল সেয়াই নহয়, ষ্টেচনৰ ভিতৰত আৰু বাহিৰত বিভিন্ন স্থানত চিচিটিভি কেমেৰা স্থাপন কৰা হ’ব।
প্ৰতিটো ডাঙৰ ষ্টেচনত এজনকৈ ষ্টেচন ডাইৰেক্টৰ থকাৰ ব্যৱস্থাও কৰা হৈছে। প্ৰয়োজন হ’লে তেওঁ ভিৰ নিয়ন্ত্ৰণৰ বাবে সকলো সিদ্ধান্ত ল’ব। উল্লেখ্য যে মহাকুম্ভৰ সময়ত দেশৰ বহু ষ্টেচনত অতিমাত্ৰা জনসমাগমৰ বাবে বিশৃংখলতাৰ সৃষ্টি হয়।
নতুন দিল্লী ষ্টেচনত ১৫ ফেব্ৰুৱাৰীত কুম্ভমেলাৰ ভক্তৰ ভিৰত ভয়াৱহ পৰিস্থিতিৰ সৃষ্টি হয়। এই ঘটনাত মহিলা আৰু শিশুসহ মুঠ ১৮ গৰাকী যাত্ৰীৰ মৃত্যু হয়। ইয়াৰ পিছত তৎপৰ হয় ৰে’ল বিভাগ। তাৰ পিছতে দেশৰ ৬০টা ষ্টেচনত যাত্ৰী নিয়ন্ত্ৰণৰ বাবে ৰে’লৱেই কেইবাটাও পদক্ষেপ গ্ৰহণ কৰিছে।
