দেওবাৰে নিশা আমেৰিকাৰ ৰাষ্ট্ৰপতি ড’নাল্ড ট্ৰাম্পে (Donald Trump) কৰা দাবী সোমবাৰে ৰাছিয়াৰ ৰাষ্ট্ৰপতি ভ্লাদিমিৰ পুটিনৰ (Vladimir Putin) চৰকাৰে মানি লয়। তাৰ পিছত ক্ৰেমলিনে জনাইছে যে ইউক্ৰেইন যুদ্ধ (War of Ukraine) সন্দৰ্ভত মঙলবাৰে চৌদি আৰৱত দুয়োপক্ষৰ প্ৰতিনিধিৰ উচ্চ পৰ্যায়ৰ বৈঠক (High-level meeting) অনুষ্ঠিত হ’ব। ট্ৰাম্পে লগতে দাবী কৰে যে শান্তিৰ প্ৰতি পুটিনৰ মনোভাব ইতিবাচক। তেনে ক্ষেত্ৰত আমেৰিকাৰ বিদেশ মন্ত্ৰী মাৰ্কো ৰুবিঅ’ৰ লগতে ৰাষ্ট্ৰীয় নিৰাপত্তা উপদেষ্টা মাইকেল ৱাল্টজেও এই বৈঠকত অংশগ্ৰহণ কৰিব পাৰে বুলি জল্পনা-কল্পনাৰ সৃষ্টি হৈছে। ৰুবিঅ’ বৰ্তমান সংযুক্ত আৰব আমিৰশ্বাহীত আছে। দেওবাৰে ট্ৰাম্পে কয় যে তেওঁ যুদ্ধ বন্ধ কৰিবলৈ ছৌদি আৰৱত থকা মস্কোৰ প্ৰতিনিধিক সাক্ষাৎ কৰিব। কিন্তু আলোচনাৰ সঠিক তাৰিখ তেওঁ নিৰ্দিষ্টকৈ উল্লেখ কৰা নাছিল।
উল্লেখ্য যে যোৱা বছৰ আমেৰিকাত নিৰ্বাচনী প্ৰচাৰৰ সময়ত ফিলাডেলফিয়াত ৰাষ্ট্ৰপতি নিৰ্বাচনৰ মুখামুখি বিতৰ্কত ট্ৰাম্পে কৈছিল, “যদি মই ৰাষ্ট্ৰপতি নিৰ্বাচনত জয়ী হওঁ তেন্তে ২৪ ঘণ্টাৰ ভিতৰত ৰাছিয়া-ইউক্ৰেইনৰ যুদ্ধ বন্ধ কৰি দিম।” আনহাতে, ট্ৰাম্পৰ সৈতে পুটিনৰ ব্যক্তিগত সমীকৰণো মসৃণ দেখা গৈছে। বহুতে বিশ্বাস কৰে যে সেই সূত্ৰৰ ভিত্তিতে ইউক্ৰেইনত শান্তিৰ পথ মুকলি কৰিব পৰা যাব। অৱশ্যে দেওবাৰে ট্ৰাম্পে কয় যে পুটিনৰ সৈতে তেওঁৰ বৈঠক হ’ব। ক্ৰেমলিনে কিন্তু এই বিষয়ে একো কোৱা নাই।
