১৯ বা ২০ ফেব্ৰুৱাৰীত দিল্লীত মুখ্যমন্ত্ৰী (Chief Minister of Delhi)ৰ শপত গ্ৰহণ (Swearing-in) অনুষ্ঠান অনুষ্ঠিত হোৱাৰ সম্ভাৱনা। শুকুৰবাৰে চৰকাৰী সূত্ৰই এই কথা প্ৰকাশ কৰিছে। আনহাতে, ১৭ বা ১৮ ফেব্ৰুৱাৰীত বিধায়িনী দলৰ বৈঠক অনুষ্ঠিত হোৱাৰ সম্ভাৱনাৰ কথাও জানিব পৰা গৈছে। শুকুৰবাৰে নিশা প্ৰধানমন্ত্ৰী নৰেন্দ্ৰ মোডী দিল্লীলৈ উভতি অহাৰ পিছতে ৰাজধানীত চৰকাৰ গঠনৰ বাবে বিজেপি হাইকমাণ্ডে প্ৰস্তুতি চলাব (BJP high command to prepare) পাৰে বুলি অনুমান কৰা হৈছে। সূত্ৰ অনুসৰি, প্ৰধানমন্ত্ৰী নৰেন্দ্ৰ মোডী, গৃহমন্ত্ৰী অমিত শ্বাহ, বিজেপিৰ সভাপতি জে পি নাড্ডাকে ধৰি বিজেপিৰ অন্যান্য শীৰ্ষ নেতাসকলৰ মাজত এখন বৈঠক অনুষ্ঠিত হ’ব।
উল্লেখ্য যে দিল্লী বিধানসভা নিৰ্বাচনত জয়ী হোৱা বিজেপিৰ ৪৮ গৰাকী বিধায়কৰ ভিতৰত ১৫ গৰাকীৰ নাম বাছনি কৰা হৈছে। ইয়াৰে ভিতৰত ৯ জনক অন্তিম তালিকাত স্থান দিয়া হৈছে। তাৰে এগৰাকী হ’ব মুখ্যমন্ত্ৰী। বাকীসকলৰ মাজৰ পৰা মন্ত্ৰী আৰু অধ্যক্ষ পদ নিৰ্বাচন কৰা হ’ব।
উল্লেখ্য যে ২৭ বছৰৰ দীঘলীয়া অপেক্ষাৰ অন্ত পেলাই ৭০ জনীয়া বিধানসভাত ৪৮ খন আসন লাভ কৰি দিল্লীত পুনৰ ক্ষমতালৈ আহে বিজেপি। বিগত দশক ধৰি দিল্লীত শাসন চলাই অহা আপে মাত্ৰ ২২ খন আসন লাভ কৰি তৃতীয়বাৰৰ বাবে শাসন দখলৰ পৰা বঞ্চিত হয়। ইয়াৰ উপৰি অৰবিন্দ কেজৰিৱাল, মনীষ ছিছোদিয়াৰ দৰে শীৰ্ষ নেতাও নিৰ্বাচনত পৰাজিত হয়।
আনহাতে, বিজেপিয়ে মুখ্যমন্ত্রী কোন হ’ব সেই কথা ঘোষণা নকৰাকৈয়ে নির্বাচনত প্রতিদ্বন্দ্বিতা কৰে৷ ইফালে কেজৰিৱালক বিপুল ব্যৱধানত পৰাস্ত কৰি জনপ্ৰিয়তা লাভ কৰা প্ৰৱেশ বাৰ্মাই দিল্লীৰ সম্ভাৱ্য মুখ্যমন্ত্ৰীৰ তালিকাত শীৰ্ষস্থান দখল কৰিছে বুলি চৰ্চা চলিছে। তেওঁৰ আন প্ৰতিদ্বন্দ্বীসকলৰ ভিতৰত আছে দিল্লী বিধানসভাত বিৰোধী দলৰ নেতা হিচাপে কাৰ্যনিৰ্বাহ কৰা বিজেপিৰ প্ৰবীণ নেতা বিজেন্দৰ গুপ্তা। লগতে এই তালিকাত আছে সতীশ উপাধ্যায় । তেৱোঁ এজন গুৰুত্বপূৰ্ণ নেতা আৰু পূৰ্বে তেওঁ ৰাজ্যৰ সভাপতি আছিল। কেন্দ্ৰীয় নেতাৰ অতি ঘনিষ্ঠ দিল্লী বিজেপিৰ সাধাৰণ সম্পাদক আশিস সুডো এই তালিকাত আছে। ইয়াৰ উপৰি আৰ এছ এছৰ প্ৰভাৱশালী নেতা জিতেন্দ্ৰ মহাজনৰ নামো তালিকাত আছে।
