মহাকুম্ভত (Maha Kumbha) পবিত্ৰ স্নানৰ বাবে (for a holy bath) আৰু ঘণ্টাৰ পিছত ঘণ্টা খোজকাঢ়িব নালাগে। এইবাৰ আৰম্ভ হৈছে হেলিকপ্টাৰ সেৱা (Helicopter Service)। উত্তৰ প্ৰদেশ ইক’ টুৰিজিম ডেভেলপমেণ্ট ব’ৰ্ড আৰু ফ্লাই ওলাই মহাকুম্ভৰ বাবে এই হেলিকপ্টাৰ সেৱা আৰম্ভ কৰিছে। এই সেৱাৰ জৰিয়তে ভক্তসকলে সহজে পবিত্ৰ স্নান কৰিব পাৰিব।
প্ৰয়াগৰাজ বিমানবন্দৰত থাকিব এই হেলিকপ্টাৰ। তীৰ্থযাত্ৰীসকলক পোনপটীয়াকৈ ত্ৰিবেণী সংগমৰ সমীপৰ হেলিপেডলৈ হেলিকপ্টাৰেৰে লৈ যোৱা হ’ব। তাৰ পৰা পবিত্ৰ স্নানৰ বাবে ভক্তসকলক নাৱেৰে পোনে পোনে সংগমলৈ লৈ যোৱা হ’ব। স্নান কৰাৰ পিছত একেখন নাৱেই ভক্তসকলক পুনৰ হেলিপেডলৈ লৈ যাব। তাৰ পিছত পুনৰ ভক্তসকলে হেলিকপ্টাৰত উঠি প্ৰয়াগৰাজ বিমানবন্দৰলৈ উভতি যাব।
এই হেলিকপ্টাৰ সেৱাৰ বাবে প্ৰতিজন ব্যক্তিৰ খৰচ হ’ব ৩৫ হাজাৰ টকা। এই সেৱাই বৃদ্ধ আৰু বিশেষভাৱে সক্ষম লোকসকলক উপকৃত কৰিব।
এই সেৱা সন্দৰ্ভত ফ্লাই ওলা গ্ৰুপৰ চিইঅ’ আৰ এছ ছেহগালে কয়, “এতিয়া ভক্তসকলে হোটেল বুকিং নকৰাকৈয়ে কুম্ভ দৰ্শন কৰিব পাৰিব। ৪ৰ পৰা ৫ ঘণ্টাৰ ভিতৰত গন্তব্যস্থানলৈ উভতি যাব পাৰিব। এবাৰ বুকিং কৰিলে তীৰ্থযাত্ৰীসকলে তাত উপস্থিত হোৱা, পবিত্ৰ স্নান আৰু বিমানবন্দৰলৈ উভতি অহাত কোনো সমস্যাৰ সন্মুখীন হ’ব নালাগে, সকলো দায়িত্ব সংগঠনৰ।”
আনহাতে, যিসকলে সম্পূৰ্ণ পেকেজ বুকিং কৰিব নোৱাৰে বা আকাশৰ পৰাই সংগম উপভোগ কৰিব বিচাৰে তেওঁলোকৰ বাবে ১২০০ টকাত আনন্দ যাত্ৰাৰো বিকল্প আছে।
