কেৰালাত দুৰ্যোগৰ ফলত মৃত্যু হোৱা লোকৰ সংখ্যা ক্ৰমাগতভাৱে বৃদ্ধি পোৱাৰ মাজতে এইবাৰ প্ৰকৃতিৰ ৰুদ্ৰৰূপ হিমাচল প্ৰদেশত। বৃহস্পতিবাৰে পুৱাৰ ভাগত ডাৱৰ বিস্ফোৰণ (Cloudburst in Himachal Pradesh)ৰ ফলত হিমাচলৰ কেইবাটাও অঞ্চল ক্ষতিগ্ৰস্ত হয়। এই পৰ্যন্ত ২ জন লোকৰ মৃত্যু (Two people died) হোৱা বুলি চৰকাৰী সূত্ৰত প্ৰকাশ। আনহাতে, সন্ধানহীন হৈছে ৫০ জনতকৈ অধিক লোক। হিমাচলৰ মুখ্যমন্ত্ৰী সুখৱিন্দৰ সিং সুখুৱে কয় যে পুৱা প্ৰায় ৪.৪০ বজাত এই ঘটনা সংঘটিত হয়। ৰাষ্ট্ৰীয় দুৰ্যোগ সঁহাৰি দল আৰু ৰাজ্যিক দুৰ্যোগ সঁহাৰি দলে উদ্ধাৰ অভিযান চলাই আছে।
প্ৰথম অৱস্থাত জানিব পৰা গৈছিল যে মাণ্ডীৰ থালটুখাৰ অঞ্চলত হোৱা ধাৰাসাৰ বৰষুণৰ বাবে কমেও ৯ জন লোক সন্ধানহীন (9 missing) হৈ আছে। তাতে এজন লোকৰ মৃত্যু হয়। মাণ্ডীৰ উপ আয়ুক্ত অপূৰ্ব দেৱগনে সংবাদ সংস্থা এএনআইক এজন লোকৰ মৃত্যুৰ কথা নিশ্চিত কৰিছে। চিমলা জিলাৰ ৰামপুৰৰ সমীপৱৰ্তী সমেজখাৰ অঞ্চলতো ধাৰাসাৰ বৰষুণৰ ফলত কমেও ১৯ জন লোক সন্ধানহীন হৈ আছে। তেওঁলোকক বিচাৰি উদ্ধাৰ অভিযান আৰম্ভ কৰা হৈছে।
অৱশ্যে বৃহস্পতিবাৰে পুৱা ডাৱৰ বিস্ফোৰণৰ ফলত কিমান ক্ষতি হৈছে সেয়া এতিয়াও জানিব পৰা হোৱা নাই।
