ভাৰতীয় বেংকিং সেৱাৰ ওপৰত চাইবাৰ আক্ৰমণ (Cyber Crime)। সংবাদ সংস্থা ৰয়টাৰৰ মতে, ‘ৰান্সোমাইৰ’ৰ আক্ৰমণৰ বাবে দেশৰ ৩০০টা ক্ষুদ্ৰ বেংকৰ ধন লেনদেন সেৱা সাময়িকভাৱে ব্যাহত হৈ পৰিছে। উক্ত বেংকসমূহক লেনদেন প্ৰযুক্তি প্ৰদান কৰা কোম্পানী চি-এজ টেকন’লজিৰ বিৰুদ্ধে ৰান্সোমাইৰৰ আক্ৰমণ সংঘটিত হয়।
ভাৰতীয় ৰিজাৰ্ভ বেংকে অৱশ্যে এই চাইবাৰ আক্ৰমণৰ সবিশেষ এতিয়াও প্ৰকাশ কৰা নাই।বুধবাৰে ভাৰতীয় ৰাষ্ট্ৰীয় পেমেণ্ট কৰ্প’ৰেচনে এক অধিসূচনা জাৰি কৰি চাইবাৰ আক্ৰমণৰ বিষয়ে অৱগত কৰে।
এন পি চি আইৰ দ্বাৰা পৰিচালিত খুচুৰা লেনদেন ব্যৱস্থাৰ পৰা “চি-এজ টেকন’লজি” সাময়িকভাৱে বিচ্ছিন্ন কৰা হৈছে বুলি তেওঁলোকে কয়। এন পি চি আইয়ে লগতে কয় যে ‘চি-এজ টেকন’লজি’ৰ প্ৰযুক্তি ব্যৱহাৰ কৰি থকা বেংকৰ গ্ৰাহকে অস্থায়ীভাৱে ধন বিনিময় কৰিব নোৱাৰিব। উক্ত বেংকসমূহ দেশৰ ধন লেনদেনৰ নেটৱৰ্ক সেৱাৰ পৰা সাময়িকভাৱে বিচ্ছিন্ন হৈ পৰিছে।
