সদ্যসমাপ্ত লোকসভা নিৰ্বাচনত বিজেপিয়ে একক সংখ্যাগৰিষ্ঠতা লাভৰ পৰা বঞ্চিত হয়। আনহাতে, ২০১৯ চনৰ তুলনাত হ্ৰাস পায় বিজেপিৰ আসনৰ সংখ্যা। কিন্তু সন্মুখত আছে মহাৰাষ্ট্ৰ, হাৰিয়ানা, ঝাৰখণ্ড আৰু জম্মু-কাশ্মীৰ বিধানসভা নিৰ্বাচন। তাৰ মাজতে আজিৰে পৰা ঝাৰখণ্ডৰ ৰাঁচীত আৰম্ভ হৈছে আৰ এছ এছৰ (RSS Meeting in Ranchi) প্ৰান্তীয় প্ৰচাৰকৰ তিনিদিনীয়া সন্মিলন।
ইফালে গেৰুৱা শিবিৰৰ নেতাসকলৰ অনুমান যে এই সন্মিলনে লোকসভাত বিজেপিৰ ক্ষমতা হ্ৰাসৰ পিছত বিজেপি আৰু আৰ এছ এছৰ সম্পৰ্কৰ সমীকৰণৰ পৰিৱৰ্তন হ’ব পাৰে। আৰ এছ এছৰ কিছু নতুন নেতাক বিজেপিত কাম কৰিবলৈ পঠিয়াব নেকি তাৰ ওপৰতো চৰ্চা চলিছে।
বিজেপিৰ অনুমান, লোকসভা নিৰ্বাচনৰ পৰৱৰ্তী পৰিস্থিতিত প্ৰচাৰকৰ ভূমিকা কি হ’ব সেই সন্দৰ্ভত সন্মিলনৰ শেষত সংঘচালক মোহন ভাগৱতৰ পৰা গুৰুত্বপূৰ্ণ ‘নিৰ্দেশনা’ আহিব পাৰে। উল্লেখ্য, লোকসভা নিৰ্বাচনৰ ঠিক পিছতেই মোহন ভাগৱতে ‘সেৱক’সকল ‘অহংকাৰী’ হোৱা বুলি সকীয়াই দিছিল। কিন্তু এই প্ৰশ্নও পুনৰ উত্থাপন হৈছে যে এই নিৰ্বাচনত আৰ এছ এছ কিমান সক্ৰিয় আছিল।
সূত্ৰ অনুসৰি, আৰ এছ এছৰ এই সন্মিলনত অংশগ্ৰহণ কৰিব পাৰে আয়োজক সম্পাদক বি এল সন্তোষে। বৈঠকৰ সময়ত বিজেপিৰ পৰৱৰ্তী সভাপতিৰ বিষয়েও আলোচনা হ’ব পাৰে।
বিজেপিৰ সাংগঠনিক সম্পাদকগৰাকী সদায় আৰ এছ এছৰ পৰা আহিছে। ইয়াৰ উপৰি অভিযোগ উত্থাপন হৈছে যে নৰেন্দ্ৰ মোডীয়ে আৰ এছ এছৰ মতাদৰ্শগত কাৰ্যসূচী অনুসৰি কাম কৰি আছে যদিও মোডীৰ যুগত আৰ এছ এছে গুৰুত্ব লাভ কৰা নাই।
আনহাতে, আৰ এছ এছৰ সূত্ৰ অনুসৰি, অহা বছৰ আৰ এছ এছৰ শতবাৰ্ষিকী। এই সন্মিলনত ইয়াৰ ওপৰতো আলোচনা কৰা হ’ব।
