নৰেন্দ্ৰ মোডী (Narendra Modi) শাসনলৈ অহাৰ সময়ত দেশৰ অৰ্থনীতিৰ ক্ষেত্ৰত পূৰ্বৰ কংগ্ৰেছ নেতৃত্বাধীন চৰকাৰক বিভিন্ন ‘তথ্য আৰু পৰিসংখ্যা’ৰ সৈতে দোষাৰোপ কৰিছিল। কিন্তু এইবাৰ মোডী চৰকাৰে স্বীকাৰ কৰিছে যে কংগ্ৰেছৰ দুজন প্ৰাক্তন প্ৰধানমন্ত্ৰী প্ৰয়াত নৰসিংহ ৰাও আৰু মনমোহন সিঙে তিনিটা গুৰুত্বপূৰ্ণ পদক্ষেপৰ জৰিয়তে লাইচেঞ্চৰাজ সমাপ্ত কৰি সংস্কাৰ কৰ্মসূচীৰ মাধ্যমেৰে ভাৰতীয় অৰ্থনীতিত এক পুনৰুজ্জীৱিতকৰণ আনিছিল।
ভাৰতৰ মুখ্য ন্যায়াধীশ ডি ৱাই চন্দ্ৰচূড়ৰ নেতৃত্বত বুধবাৰে ভাৰতত অৰ্থনৈতিক উদাৰীকৰণ আৰু সম্পৰ্কিত আইনৰ ওপৰত এটা গোচৰৰ শুনানি গ্ৰহণ কৰাৰ সময়ত কেন্দ্ৰৰ হৈ উপস্থিত থকা ছলিচিটৰ জেনেৰেল তুষাৰ মেহতাই কয়,
“১৯৯০ৰ দশকৰ আৰম্ভণিতে প্ৰধানমন্ত্ৰী ৰাও আৰু তেওঁৰ বিত্ত মন্ত্ৰী মনমোহন সিঙে প্ৰৱৰ্তন কৰা অৰ্থনৈতিক সংস্কাৰৰ ফলত কোম্পানী আইন আৰু একচেটিয়া আৰু প্ৰতিবন্ধক বাণিজ্য অনুশীলন আইনকে (এমআৰটিপি) ধৰি অসংখ্য আইন উত্থাপন হৈছিল। এই গুৰুত্বপূৰ্ণ পদক্ষেপৰ বাবেই পৰৱৰ্তী তিনি দশকৰ বাবে পৰৱৰ্তী চৰকাৰসমূহে ১৯৫১ চনৰ ঔদ্যোগিক (উন্নয়ন আৰু নিয়ন্ত্ৰণ) আইন সংশোধন কৰাৰ প্ৰয়োজনীয়তা বোধ কৰা নাই।”
বুধবাৰে শুনানিৰ সময়ত ছলিচিটৰ জেনেৰেল মেহতাই উদ্যোগ (উন্নয়ন আৰু নিয়ন্ত্ৰণ) আইন, ১৯৫১ক “লাইচেন্সৰাজ যুগৰ বিভাজনমূলক কাৰ্য” বুলি অভিহিত কৰে। তেওঁ অৱশ্যে শীৰ্ষ ন্যায়ালয়ক কয় যে নৰসিংহ-মনমোহন চৰকাৰৰ অৰ্থনৈতিক সংস্কাৰ নীতিৰ বাবে আইনখন প্ৰায় অপ্ৰাসংগিক হৈ পৰিছে। ২০১৪ চনৰ লোকসভা নিৰ্বাচনৰ প্ৰাকমুহূৰ্তত মোডীয়ে বিজেপিৰ প্ৰধানমন্ত্ৰী পদৰ প্ৰাৰ্থী হিচাপে নীতিগত পক্ষাঘাতক লৈ ইউপিএ চৰকাৰ আৰু কংগ্ৰেছক আক্ৰমণ কৰি আহিছিল। তেওঁ দাবী কৰিছিল যে ইয়াৰ বাবে বিকাশৰ হাৰ স্তব্ধ হৈ গৈছে।
ক্ষমতালৈ অহাৰ পিছত তেওঁৰ চৰকাৰে ২০১৫ চনত জিডিপি গণনা কৰাৰ পদ্ধতি সলনি কৰিছিল। ই আধাৰ বৰ্ষটোও সলনি কৰিছিল। কিন্তু এক দশকৰ পিছত তেওঁৰ চৰকাৰে দেশৰ অৰ্থনৈতিক পুনৰুদ্ধাৰত ৰাও-সিঙৰ অৱদান স্বীকাৰ কৰিলে।
