কৰ্ণাটকৰ (Karnataka) এগৰাকী মহিলা মন্ত্ৰীক বিজেপি নেতা সঞ্জয় পাটিলে কৰা ‘আপত্তিজনক’ মন্তব্যৰ বাবে এতিয়া বিতৰ্কৰ মাজত সোমাই পৰিছে।ৰাজ্যখনৰ মহিলা আৰু শিশু উন্নয়ন মন্ত্ৰী লক্ষ্মী হেব্বলকাৰক ভাল টোপনিৰ বাবে সুৰা সেৱন কৰিবলৈ বিজেপি নেতাগৰাকীয়ে পৰামৰ্শ দিয়ে।
যাৰ বাবে কংগ্ৰেছে বিজেপিক আক্ৰমণৰ লক্ষ্য কৰি লয়। অভিযোগ অনুসৰি, সঞ্জয়ে এনে মন্তব্য কৰি কেৱল মন্ত্ৰীগৰাকীকেই নহয় সমগ্ৰ নাৰী সমাজক অপমান কৰিছে। আনহাতে, বিৰোধী দলৰ সদস্যসকলে কয় যে বিজেপিৰ পতনৰ সময় ওচৰ চাপিছে।
উল্লেখযোগ্য যে শনিবাৰে কৰ্ণাটকৰ বেলগাৱী চহৰত বিজেপিৰ উদ্যোগত এক সমাবেশ অনুষ্ঠিত হয়। তাত উপস্থিত থাকে বিজেপি নেতা সঞ্জয়। উল্লেখযোগ্য যে মন্ত্ৰী লক্ষ্মীৰ পুত্ৰ মৃণাল ৰবীন্দ্ৰ হেব্বলকাৰ উক্ত লোকসভা সমষ্টিৰ বাবে কংগ্ৰেছৰ প্ৰাৰ্থী। তেওঁ বিজেপি নেতা তথা কৰ্ণাটকৰ প্ৰাক্তন মুখ্যমন্ত্ৰী জগদীশ শেত্তাৰৰ বিৰুদ্ধে প্ৰতিদ্বন্দ্বিতা কৰিছে। বিজেপি প্ৰাৰ্থীগৰাকীৰ সমৰ্থনত দিয়া ভাষণৰ সময়ত কংগ্ৰেছ প্ৰাৰ্থীগৰাকীৰ মাতৃক আক্ৰমণ কৰে সঞ্জয়ে। অঞ্চলটোত বিজেপিৰ প্ৰভাৱৰ কথা ক’বলৈ গৈ তেওঁ কয়, “মই কৰ্ণাটকৰ আঠটা ভিন্ন অঞ্চলত দলীয় প্ৰভাৰী হিচাপে কাম কৰিছো। সকলোতে দেখিছোঁ বৃহৎ সংখ্যক মহিলা বিজেপিলৈ আহিছে। গতিকে মই বিচাৰো মোৰ ইয়াত (লক্ষ্মী) বাইদেউৱে নিশা টোপনিৰ বড়ি খাই ভালকৈ শুব। বা মদৰ অতিৰিক্ত পেগ এটা লৈ শুই যাওক। তেওঁৰ টোপনি উৰি গৈছে।”
সঞ্জয়ৰ মন্তব্যক লৈ কংগ্ৰেছে আক্ৰমণ তীব্ৰতৰ কৰি তুলিছে। লগতে বিৰোধীয়ে বিজেপিক ‘মহিলা বিৰোধী দল’ বুলি আক্ৰমণ কৰে। এক্সত কৰ্ণাটক কংগ্ৰেছে লিখিছে, “নাৰীক হেয়জ্ঞান কৰাসকলৰ পতন ওচৰ চাপিছে। বিজেপিৰ অৱনতিও আৰম্ভ হৈছে। গতিকে তেওঁলোকৰ নাৰী বিৰোধী মানসিকতা পোহৰলৈ আহিছে। কৌৰৱ আৰু ৰাৱণৰ দৰে তেওঁলোকো নিঃশেষ হৈ যাব।”
