আশংকা কৰা মতেই সোমবাৰে শ্বেয়াৰ বজাৰ খোলাৰ লগে লগে বৃহৎ পতন আৰম্ভ হয়। ইৰাণ-ইজৰাইল (Iran-Israel) যুদ্ধৰ পৰিণতিতে শ্বেয়াৰ বজাৰত এই পতন ঘটে। দিনটোৰ আৰম্ভণিতে চেন্সেক্স ৭৩৬ পইণ্ট হ্ৰাস পাই ৭৩,৫০৮ পইণ্ট হয়। আনহাতে, নিফটি ২৩৪ পইণ্ট হ্ৰাস পাই ২২,২৮৫ পইণ্টত উপনীত হয়। দালাল ষ্ট্ৰীটৰ এই পৰিস্থিতিৰ ফলত বিনিয়োগকাৰীৰ মূৰত আকাশী সৰগ ভাঙি পৰিছে।
জানিব পৰা মতে, শ্বেয়াৰত বিনিয়োগকাৰীসকলে ৮.২১ লাখ কোটি টকাৰ লোকচানৰ সন্মুখীন হ’ব লাগিব। টাটা মটৰ্ছ, বাজাজ ফাইনেন্স চাৰ্ভিচেছ, টাটা ষ্টীল, বাজাজ ফাইনেন্স, এনটিপিচি, এছবিআই আদি কোম্পানীৰ শ্বেয়াৰত যথেষ্ট ক্ষতিগ্ৰস্ত হয়।
উল্লেখযোগ্য যে ১ এপ্ৰিলত ছিৰিয়াত থকা ইৰাণৰ দূতাবাসত ইজৰাইলে ক্ষেপণাস্ত্ৰৰে আক্ৰমণ কৰে।
ইয়াৰ ফলত কমেও ১৩ জন লোকে প্ৰাণ হেৰুৱায়। নিহতসকলৰ ভিতৰত ইৰাণী সেনাৰ দুজন বিষয়াও আছে। ইয়াৰ পিছত ইৰাণে ইজৰাইলক অহৰহ সতৰ্কবাণী জাৰি কৰে। তাৰ পিছত অৱশেষত শনিবাৰে নিশা তেহৰানে ইজৰাইলৰ ওপৰত ইটোৰ পিছত সিটো মিছাইল নিক্ষেপ কৰিবলৈ আৰম্ভ কৰে। ফলত তৃতীয় বিশ্বযুদ্ধৰ আশংকা অধিক ঘনীভূত হৈ পৰে। এই ভয়ংকৰ পৰিস্থিতিৰ বাবেই শ্বেয়াৰ বজাৰৰ পতন ঘটে।
বিশেষজ্ঞসকলৰ মতে, চলিত সপ্তাহত শ্বেয়াৰ বজাৰৰ ওপৰত কেইবাটাও কাৰকে নিৰ্ভৰ কৰিছে। দেশৰ পাইকাৰী মুদ্ৰাস্ফীতিৰ তথ্য, চীনৰ জিডিপি বৃদ্ধিৰ হাৰ, আমেৰিকাৰ উৎপাদন আদিয়ে শ্বেয়াৰ বজাৰত প্ৰভাৱ পেলাব।
বিশেষজ্ঞসকলে লগতে দাবী কৰিছে যে চলিত সপ্তাহৰ শেষত ইনফ’ছিছ, বাজাজ অটো আৰু উইপ্ৰ’ৰ উপাৰ্জনৰ ফলত বজাৰ প্ৰভাৱিত হ’ব পাৰে। কাৰণ এই কোম্পানীবোৰৰ ফলাফল বেয়া হ’লে বজাৰ আৰু অধিক তললৈ নামি যাব পাৰে।
