ইৰাণ আৰু ইজৰাইলৰ (Iran & Israel) মাজত সংঘটিত শেহতীয়া সংঘৰ্ষত ভাৰতে নিৰপেক্ষ স্থিতি গ্ৰহণ কৰিছে। অৱশ্যে ভাৰতৰ বৈদেশিক পৰিক্ৰমা মন্ত্ৰালয়ে দেওবাৰে কয় যে নতুন দিল্লীয়ে দুয়োখন দেশৰ মাজত যুদ্ধৰ পৰিস্থিতিৰ ওপৰত নজৰ ৰাখিছে।
যদি ইৰাণ আৰু ইজৰাইলৰ মাজত যুদ্ধৰ অৱনতি ঘটে, ই অৰ্থনীতিৰ ওপৰত প্ৰত্যক্ষ প্ৰভাৱ পেলাব। ইয়াৰ ফলত খাৰুৱা তেলৰ মূল্য বৃদ্ধি হ’ব পাৰে। যাৰ ফলত প্ৰভাৱিত হ’ব ভাৰতো।
ব্লুমবাৰ্গৰ এক প্ৰতিবেদন অনুসৰি, সাম্প্ৰতিক পৰিস্থিতিত খাৰুৱা তেলৰ মূল্য প্ৰতি বেৰেলত ৯০ ডলাৰ অতিক্ৰম কৰিছে। যদি ইৰাণ আৰু ইজৰাইলৰ মাজত সংঘৰ্ষ অব্যাহত থাকে, তেন্তে কেইদিনমানৰ ভিতৰতে এই মূল্যই ১০০ ডলাৰ স্পৰ্শ কৰিব। যিটোৱে বিশ্ব অৰ্থনীতিৰ ওপৰত প্ৰভাৱ পেলাব। ইয়াৰ ফলত ভাৰতো ক্ষতিগ্ৰস্ত হ’ব।
উল্লেখযোগ্য যে ভাৰতে দেশখনৰ বাবে প্ৰয়োজনীয় মুঠ খাৰুৱা তেলৰ ৮০ শতাংশ আমদানি কৰে। যদি এনেদৰে খাৰুৱা তেলৰ মূল্য বৃদ্ধি হয়, তেন্তে আমদানিৰ ব্যয় পূৰণ কৰিবলৈ ভাৰতে বৃহৎ পৰিমাণ পৰিশোধ কৰিব লাগিব। তেনে ক্ষেত্ৰত ভাৰতত মুদ্ৰাস্ফীতি হ’ব পাৰে। অৰ্থনৈতিক বিশেষজ্ঞসকলৰ মতে, বাণিজ্যিক ভাৰসাম্যহীনতা আৰু চলিত হিচাপৰ ঘাটিয়ে অৰ্থনীতিৰ ওপৰত চাপ সৃষ্টি কৰিব।
বিশ্বৰ আন দেশৰ তুলনাত ভাৰত তেল আমদানিকৰ্তাৰ তালিকাত শীৰ্ষত আছে। ভাৰতৰ বেছিভাগ তেল মধ্য প্ৰাচ্যৰ পৰা আহে। সেয়েহে ইৰাণ-ইজৰাইল সংঘৰ্ষৰ বাবে ভাৰতে লোকচানৰ সন্মুখীন হ’ব পাৰে। অৱশ্যে ভাৰতে ইতিমধ্যে ৰাছিয়াক এক বিকল্প পথ হিচাপে বাছনি কৰিছে। ২০২৩ চনৰ পৰিসংখ্যা অনুসৰি, ভাৰতে ৰাছিয়াৰ পৰা ৩৫ শতাংশ খাৰুৱা তেল আমদানি কৰিছিল।
উল্লেখযোগ্য যে দেওবাৰে ইৰাণে ইজৰাইলৰ ভূখণ্ডক লক্ষ্য কৰি প্ৰায় ২০০ ড্ৰোনচালিত মিছাইল আক্ৰমণ আৰম্ভ কৰে। অৱশ্যে ইয়াৰ পূৰ্বে আমেৰিকাৰ সামৰিক বাহিনীয়ে মাজ আকাশতে এই ড্ৰোন ধ্বংস কৰাৰ দাবী কৰিছে। আনহাতে, আমেৰিকাৰ লগতে ব্ৰিটেইনেও ইজৰাইলক এই কামত সহায় কৰিছে।
উল্লেখ্য, ১ এপ্ৰিলত ইজৰাইলে চিৰিয়াৰ দামাস্কাছত থকা ইৰানী দূতাবাসত বোমা বিস্ফোৰণ কৰে। দেওবাৰে ইৰাণৰ তৰফৰ পৰা এই আক্ৰমণৰ প্ৰতিক্ৰিয়া আহে।
আনহাতে, চিৰিয়াত হোৱা আক্ৰমণৰ পিছৰে পৰা বিশ্ববজাৰত তেলৰ মূল্য বৃদ্ধি পাই আহিছে। ইৰাণৰ আক্ৰমণৰ ফলত ইজৰাইল, চৌদি আৰৱকে ধৰি পশ্চিম এছিয়াৰ কেইবাখনো দেশৰ শ্বেয়াৰ বজাৰ হ্ৰাস পায়। এইটো আশংকা কৰা হৈছে যে যদি যুদ্ধৰ পৰিস্থিতি অব্যাহত থাকে তেন্তে ইয়াৰ প্ৰভাৱ আৰু বৃদ্ধি পাব পাৰে।
