দামাস্কাছত ইৰানী দূতাবাসত বোমা বিস্ফোৰণৰ প্ৰতিশোধ স্বৰূপে ইৰাণে দেওবাৰে ইজৰাইলৰ ওপৰত ড্ৰোন আক্ৰমণ (India on Iran Israel conflict) চলায়। ইজৰাইলী অঞ্চলত প্ৰায় ২০০ টা ড্ৰোন নিক্ষেপ কৰা হয়। অৱশ্যে ইজৰাইল আৰু আমেৰিকান বাহিনীয়ে ইজৰাইলত আঘাত কৰাৰ পূৰ্বে বেছিভাগ ড্ৰোন আকাশতে ধ্বংস কৰে। কিন্তু ইৰাণৰ এই আক্ৰমণৰ ফলত পশ্চিম এছিয়াৰ পৰিস্থিতি পুনৰ গৰম হৈ পৰিছে।
ইৰাণৰ আক্ৰমণৰ পৰিপ্ৰেক্ষিতত ইজৰাইলে কোনো ডাঙৰ প্ৰতিশোধৰ পৰিকল্পনা কৰিছে নেকি সেই বিষয়ে চৰ্চা আৰম্ভ হৈছে। ইফালে বৈদেশিক পৰিক্ৰমা মন্ত্ৰী এছ জয়শংকৰে ইৰাণ আৰু ইজৰাইল দুয়োদেশৰ বৈদেশিক মন্ত্ৰালয়ৰ সৈতে ফোনযোগে কথা পাতে। তেওঁলোকে পশ্চিম এছিয়াৰ পৰিস্থিতিৰ বিষয়ে আলোচনা কৰে।
দেওবাৰে নিশা জয়শংকৰে এক্স হেন্ডেলত জনায় যে তেওঁ ইৰাণৰ বৈদেশিক মন্ত্ৰী হোছেইন আমিৰ আব্দোল্লাহিয়ানৰ সৈতে কথা পাতিছে।
তেওঁ লিখিছে, “মই ইৰাণৰ বৈদেশিক মন্ত্ৰীৰ সৈতে ফোনত কথা পাতিছিলো। আমি এমএছচি এৰিছৰ ১৭ জন সদস্যৰ মুক্তিৰ বিষয়ে কথা পাতিছো। আমি পশ্চিম এছিয়াৰ সাম্প্ৰতিক পৰিস্থিতিৰ বিষয়েও আলোচনা কৰিছো। মই তেওঁক কৈছো যে আক্ৰমণৰ পৰা বিৰত থাকিব লাগিব, শান্তি বজাই ৰাখিব লাগিব আৰু কূটনীতিৰ আশ্ৰয় লোৱাৰ প্ৰয়োজন আছে। আমি ইজনে সিজনৰ সৈতে যোগাযোগত থাকিবলৈ সন্মত হৈছো।”
ইয়াৰ ঠিক পিছতে জয়শংকৰে এক্সত আন এটা পোষ্ট কৰে। তাত তেওঁ কৈছে, “মই এইমাত্ৰ ইজৰাইলৰ বৈদেশিক মন্ত্ৰীৰ সৈতে কথা পাতিছো। আমি শনিবাৰৰ পৰা অঞ্চলটোত যি ঘটি আছে সেই বিষয়ে উদ্বেগ প্ৰকাশ কৰিছো। মই শান্তিৰ বাবে আবেদন জনাইছো। আমি যোগাযোগত থাকিম।”
ইৰাণৰ আক্ৰমণৰ পিছত ইজৰাইলৰ সামৰিক মুখপাত্ৰ ডেনিয়েল হাগাৰীয়ে কয় যে তেওঁলোক অতি সতৰ্ক হৈ আছে। অনাগত দিনত তেওঁলোকৰ প্ৰতিৰক্ষামূলক আৰু আক্ৰমণাত্মক পদক্ষেপবোৰ আলোচনা কৰা হৈছে।
সূত্ৰ অনুসৰি, ইজৰাইল প্ৰতিৰক্ষা বাহিনীয়ে ইতিমধ্যে দেশখনৰ চৰকাৰৰ বিৰুদ্ধে প্ৰতিশোধ লোৱাৰ প্ৰস্তাৱ দিছে। ইৰাণৰ সৈতে অসহযোগৰ প্ৰস্তাৱো আছে। আনহাতে, আমেৰিকাই স্পষ্ট কৰি দিছে যে যদি ইজৰাইলে ইৰাণৰ বিৰুদ্ধে প্ৰতিশোধ লোৱাৰ কথা ভাবে, তেন্তে আমেৰিকা তেওঁলোকৰ পক্ষত নাথাকিব।
আন দেশসমূহেও অঞ্চলটোত শান্তি স্থাপনৰ আহ্বান জনাইছে। দেওবাৰে নিশা ৰাষ্ট্ৰসংঘত ইৰাণ আৰু ইজৰাইলৰ মাজৰ পৰিস্থিতি সন্দৰ্ভত এখন বৈঠক অনুষ্ঠিত হয়। তাত ইৰাণৰ কাৰ্যকলাপক তীব্ৰ সমালোচনা কৰা হয়। ৰাষ্ট্ৰসংঘই বেঞ্জামিন নেতানিয়াহুক প্ৰতি আক্ৰমণৰ পৰা বিৰত থাকিবলৈ পৰামৰ্শ দিয়ে।
