নিৰ্বাচনৰ পূৰ্বে উত্তৰ প্ৰদেশৰ এগৰাকী কংগ্ৰেছ প্ৰাৰ্থীৰ মন্তব্যক লৈ বিতৰ্কৰ সৃষ্টি হৈছে। তেওঁৰ বিৰুদ্ধে নিৰ্বাচন আয়োগত এজাহাৰ দাখিল কৰিছে বিজেপিয়ে। অভিযোগ অনুসৰি, ৰাজহুৱা সভাত প্ৰৰোচনামূলক মন্তব্য কৰিছিল প্ৰাৰ্থীগৰাকীয়ে। বিজেপিৰ দাবী, তেওঁৰ এই মন্তব্যই সমাজৰ এক নিৰ্দিষ্ট শ্ৰেণীক উচটনি দিছে।
উল্লেখযোগ্য যে উত্তৰ প্ৰদেশৰ চাহাৰানপুৰ সমষ্টিৰ কংগ্ৰেছৰ প্ৰাৰ্থী ইমৰাণ মাছুদে (Imraan Masood) শেহতীয়াকৈ নিৰ্বাচনৰ প্ৰচাৰ চলাই তেওঁ ৰাজহুৱা সভাত বিজেপিক আক্ৰমণ কৰে। তেওঁ কয়, “বিজেপি ক্ষমতালৈ আহিলে প্ৰথমে মোক আৰু তাৰ পিছত আপোনালোকক মাৰিব। গতিকে এই নিৰ্বাচন মোৰ জয়ৰ বাবে নহয়। নিজকে বচাবলৈ এই নিৰ্বাচন।” বিজেপিয়ে ইমৰাণৰ এই মন্তব্যক সমালোচনা কৰে। কংগ্ৰেছ প্ৰাৰ্থীগৰাকীৰ বিৰুদ্ধে দলৰ লক্ষ্ণৌৰ মুখ্য কাৰ্যালয়ৰ পৰা নিৰ্বাচন আয়োগত এজাহাৰ দাখিল কৰা হৈছে।
লিখিত অভিযোগত বিজেপিয়ে দাবী কৰিছে যে ইমৰানে তেওঁৰ ৰাজহুৱা সভাত সমাজৰ এটা বিশেষ শ্ৰেণীক উচটনি দিব বিচাৰিছে। তেওঁৰ মন্তব্য উচটনিমূলক। বিজেপিয়ে লগতে কয় যে ইমৰানে সমাজৰ সেই বিশেষ শ্ৰেণীটোৰ মাজত ভয়ৰ বাতাবৰণ সৃষ্টি কৰি তেওঁলোকক আনৰ সৈতে যুঁজিবলৈ উচটনি দিবলৈ চেষ্টা চলাইছে। ইমৰানে হিংসাৰ জৰিয়তে নিৰ্বাচনত প্ৰভাৱ পেলাবলৈ চেষ্টা কৰিছে, যিটো আচৰণ বিধি বিৰোধী।
ৰাজহুৱা সভাত ইমৰানে কোৱা কথাৰ এটা ভিডিঅ’ও ছ’চিয়েল মিডিয়াত ভাইৰেল হৈ পৰে। তাৰ পৰিপ্ৰেক্ষিতত বিজেপিয়ে আয়োগৰ কাষ চাপিছে। ভিডিঅ’টোত তেওঁ কোৱা শুনা গৈছে যে “বিজেপি ক্ষমতালৈ আহিলে প্ৰথমে মোক আৰু তাৰ পিছত আপোনালোকক শিক্ষা দিব, এই কথা মনত ৰাখিব।”
