ডিফু চহৰৰ দাঁতিকাষৰীয়া কাকতি ৰংহাং অঞ্চলৰ বৰছিং তিমুং গাঁৱত ডাইনীৰ সন্দেহত (Witch-hunting) এটা পৰিয়ালৰ ওপৰত অত্যাচাৰ চলাৰ লগতে পৰিয়ালটোক গাঁও এৰি যাবলৈ বাধ্য কৰা হৈছিল।
গাঁওবাসীয়ে পৰিয়ালটোৰ মুৰব্বী সুৰেণ তেৰাং আৰু তেওঁৰ পত্নীক কণমানি কন্যা শিশুৰ সন্মুখত মাছ ধৰা জালেৰে আবদ্ধ কৰি অত্যাচাৰ কৰাৰ লগতে পৰিয়ালটো ডাইনী বুলি স্বীকাৰ কৰিবলৈ বাধ্য কৰিছিল। এই বাতৰি লাভ কৰি ডিফু আৰক্ষীয়ে তৎপৰতাৰে নিশাই পৰিয়ালটোক উদ্ধাৰ কৰি ডিফু থানালৈ লৈ আনে।
এই সংক্রান্তত ডিফু আৰক্ষীয়ে নিজাববীয়াকৈ এটা গোচৰ ৰুজু কৰি তদন্ত জোৰদাৰ গতিত আৰম্ভ কৰিছিল।যাৰ বাবে গাঁওখনৰ বহু লোকক আৰক্ষীয়ে জেৰা চলোৱাৰ অন্তত এই ডাইনী কাণ্ডৰ মূল অভিযুক্ত আৰু ডাইনী কাণ্ডৰ মূল ষড়যন্ত্ৰকাৰী দুজন ব্যক্তিক আৰক্ষীয়ে গ্রেপ্তাৰ কৰে।
ডিফু আৰক্ষীয়ে ১১৪/২৪ গোচৰৰ ভিত্তিৰ আধাৰত দুজন ব্যক্তিক গ্ৰেপ্তাৰ কৰে। গ্ৰেপ্তাৰ কৰা ব্যক্তি দুজন ক্রমে— ৰাজেন্দ্ৰ বে’ (৫৩), আৰু অর্জুন বে’(২৬)। আৰক্ষীয়ে প্ৰকাশ কৰা অনুসৰি দুয়োজন ব্যক্তি বৰছিং তিমুং গাঁৱৰে বাসিন্দা।
উল্লেখ্য যে যোৱা ১৩ নৱেম্বৰৰ নিশা ঘটনা সংঘটিত হৈছিল। ইয়াৰ পিছতেই আৰক্ষীয়ে তৎপৰতা প্ৰদৰ্শন কৰি উক্ত গাঁওখনৰ লগতে দাঁতিকাষৰীয়া অঞ্চলত এনে অন্ধ বিশ্বাসৰ বিৰুদ্ধে সজাগতা ন সভাও অনুষ্ঠিত কৰিছিল।
