Subramanian Swamy Opposes Rahul Gandhi’s Plea For Passport I ৰাহুলৰ পাছপোৰ্ট আবেদনৰ বিৰোধিতা সুব্ৰমণিয়াম স্বামীৰ

বিজেপি নেতা সুব্ৰমণিয়াম স্বামীয়ে (Subramanian Swamy) ৰাহুল গান্ধীক (Rahul Gandhi)  নতুন পাছপোৰ্ট দিয়াৰ ক্ষেত্ৰত আপত্তি দৰ্শাইছে। তেওঁ দাবী কৰে যে ৰাহুল গান্ধীক যদি বিদেশলৈ যোৱাৰ অনুমতি দিয়া হয় তেন্তে নেচনেল হেৰাল্ডৰ (National Herald) তদন্তত বাধা আহিব।

লোকসভাৰ সাংসদ পদ নাকচ হোৱাৰ পিছত ৰাহুল গান্ধীয়ে সাংসদ হিচাপে কূটনৈতিক পাছপোৰ্ট জমা দি নতুন পাছপোৰ্টৰ বাবে আবেদন কৰে। ৰাহুলে দিল্লীৰ ৰাউজ এভিনিউ কোৰ্টত তাৰ বাবে ‘ন’-অবজেকচন চাৰ্টিফিকেট’ লাভৰ আবেদন জনায়। কিন্তু স্বামীয়ে তাৰ বিৰোধিতা কৰি নেচনেল হেৰাল্ডৰ দুৰ্নীতিৰ গোচৰত ছোনিয়া গান্ধী আৰু ৰাহুল গান্ধীৰ সৈতে কংগ্ৰেছ নেতাসকলৰো তদন্ত চলি আছে বুলি যুক্তি আগবঢ়ায়। এই সময়ত ৰাহুলক বিদেশলৈ যাবলৈ দিলে তদন্তৰ ক্ষতি হʼব পাৰে।

নেচনেল হেৰাল্ডৰ গোচৰত ৰাহুল গান্ধীক দীঘলীয়াকৈ জেৰা কৰিছিল ইডিয়ে। ৰাহুলে আদালতৰ পৰাও আগতীয়াকৈ জামিন লাভ কৰে। অতিৰিক্ত মুখ্য মহানগৰ দণ্ডাধীশ বৈভৱ মেহতাই কয় যে, আগতীয়া জামিন আদেশত ৰাহুলৰ বিদেশ ভ্ৰমণৰ ক্ষেত্ৰত কোনো চৰ্ত আৰোপ কৰা হোৱা নাই। অৱশ্যে ৰাহুলৰ এই আবেদনৰ বিৰোধিতা কৰি প্রত্যুত্তৰ দিয়াৰ অধিকাৰ স্বামীৰ আছে৷ কাৰণ এই গোচৰত তেওঁ মূল অভিযোগকাৰী। এই গোচৰৰ পৰৱৰ্তী শুনানি ২৬ মেʼত হʼব।

ইয়াৰ ফলত অহা সপ্তাহত ৰাহুল গান্ধীৰ আমেৰিকা ভ্ৰমণক লৈ অনিশ্চয়তাৰ সৃষ্টি হৈছে। কাৰণ ২৮ মেʼত ৰাহুলৰ আমেৰিকালৈ যোৱাৰ কথা। ‘ইণ্ডিয়ান অভাৰচিজ কংগ্ৰেছ’ৰ উদ্যোগত প্ৰবাসী ভাৰতীয়ৰ সন্মিলনত অংশগ্ৰহণ কৰিব। অহা ২৮ মেʼত ষ্টেনফ’ৰ্ড বিশ্ববিদ্যালয়ত ‘দ্য নিউ গ্লোবেল ইকুইলিব্ৰিয়াম’ বিষয়ক বক্তৃতা প্ৰদান কৰাৰ কথা আছে ৰাহুলৰ।